<རིག་ཁམས་རྣམ་པར་དག་པའི་མཁའ་དབྱིངས་སུ།
མཁྱེན་དང་བརྩེ་བའི་བསིལ་ཟེར་འབུམ་འཁྱིལ་ཞིང་།
དང་པོའི་སེམས་མཆོག་ཟླ་བ་ཚེས་པ་ནས།
སྒྲིབ་བྲལ་སེམས་ཀྱི་ཟླ་བ་ཉ་བའི་བར།
ས་དང་ལམ་གྱི་བགྲོད་པ་མི་འགོག་པའི།
སར་གནས་སེམས་དཔའི་ཚོགས་ལ་གུས་པས་འདུད།།br />
ལམ་གྱི་ངོ་བོ། གང་ཞིག་ཉམས་སུ་བླངས་བས་འབྲས་བུ་བྱངས་ཆུབ་གསུམ་པོ་གང་རུང་ཐོབ་པར་བྱེད་པའི་ཆོས་སམ་ཐབས་སོ། འཇིག་རྟེན་ན་ལམ་ལ་ཞུག་ཏེ་སོང་བས་རང་གང་དུ་འགྲོ་འདོད་པའི་ཡུལ་དུ་སླེབས་པ་བཞིན། ཐེག་པ་གསུམ་གྱི་ཆོས་ཉམས་སུ་བླངས་བ་ལས་འབྲས་བུ་བྱང་ཆུབ་གསུམ་པོ་ཅི་རིགས་པ་ཐོབ་པར་བྱེད་པས་ན། ལམ་ཞེས་བྱའོ། དེ་ལ་དབྱེ་ན། ཉན་ཐོས་ཀྱི་ལམ་དང་། རང་རྒྱལ་གྱི་ལམ། བྱང་སེམས་ཀྱི་ལམ་གསུམ། གང་དུ་ཞུག་པས་རང་འབྲས་དགྲ་བཅོམ་གྱི་སར་ཕྱིན་པར་བྱེད་པའི་ཐབས་སམ་ཆོས་དེ་། ཉན་ཐོས་ལམ་གྱི་མཚན་ཉིད། དབྱེ་ན་ཉན་ཐོས་ཀྱི་ལམ་ལྔ། གང་ལ་ཞུག་པས་རང་འབྲས་རང་སངས་རྒྱས་ཀྱི་སར་ཕྱིན་པར་བྱེད་པའི་ཐབས་སམ་ཆོས་དེ་རང་རྒྱལ་ལམ་གྱི་མཚན་ཉིད། དབྱེ་ན་རང་རྒྱལ་གྱི་ལམ་ལྔ། གང་ཞིག་ཉམས་སུ་བླང་པས་རང་འབྲས་སངས་རྒྱས་ཀྱི་སར་ཕྱིན་པར་བྱེད་པའི་ཐབས་སམ་ཆོས་དེ་བྱང་སེམས་ལམ་གྱི་མཚན་ཉིད། དབྱེ་ན་བྱང་སེམས་ཀྱི་ལམ་ལྔའོ། དེ་དག་ལས་འདིར་བྱང་སེམས་ཀྱི་ལམ་ཉིད་བྱེ་བྲག་ཏུ་བཤད་པ་ལ་ལྔ། ཚོགས་ལམ། སྦྱོར་ལམ། མཐོང་ལམ། བསྒོམ་ལམ། མི་སློབ་པའི་ལམ་བཤད་པའོ། སྟོང་ཉིད་ཀྱི་དོན་ལ་ཞི་ལྷག་གི་རྣལ་འབྱོར་མ་ཐོབ་པས་ལུས་ངག་གི་ཚོགས་གསོག་དང་གཙོ་བོར་འབྲེལ་བའི་ལམ་ཚོགས་ལམ་གྱི་ངོ་བོ། མིང་གཞན། ཆོས་མངོན་རྟོགས་ཞེས་བྱ་སྟེ། གསུངས་རབ་ཀྱི་ཚིགས་དོན་གཉིས་ལས་གཙོ་བོར་ཆོས་ཚིགས་ཙམ་རྒྱུད་ལ་སྐྱེ་བའི་གནས་སྐབས་ཡིན་པས་སོ། ཐེག་ཆེན་སེམས་བསྐྱེད་ནམ་རྒྱུད་ལ་སྐྱེས་པ་ན་གང་ཟག་དེ་ཚོགས་ལམ་པར་འཇོག་པ་ཡིན་ནོ། སྟོང་ཉིད་ཀྱི་དོན་ལ་ཞི་ལྷག་ཀྱི་རྣལ་འབྱོར་ཐོབ་ཀྱང་མངོན་སུམ་དུ་མ་རྟོགས་པའི་སྐབས་ཀྱི་ལམ། སྦྱོར་ལམ་གྱི་ངོ་བོ། མིང་གཞན་དོན་མངོན་རྟོགས་ཞེས་བྱ་སྟེ། གསུངས་རབ་ཀྱི་ཚིགས་དོན་གཉིས་ལས་ཚིགས་ཙམ་མ་ཟད་དོན་ཞི་ལྷག་གི་རྣལ་འབྱོར་ཚུལ་བཞིན་རྒྱུད་ལ་སྐྱེས་པས་ནའོ། སྟོང་ཉིད་ཐོག་མར་མངོན་སུམ་དུ་རྟོགས་པའི་ལམ། མཐོང་ལམ་གྱི་ངོ་བོ། མིང་གཞན་བདེན་པ་མངོན་རྟོགས་ཅེས་བྱ་སྟེ། བདེན་བཞིའི་དོན་ཐོགས་མར་མངོན་སུམ་དུ་རྟོགས་པས་ནའོ། སྟོང་ཉིད་མངོན་སུམ་དུ་མཐོང་བའི་དོན་ལ་ཡང་ཡང་གོམ་པར་བྱེད་པའི་ལམ། བསྒོམ་ལམ་གྱི་ངོ་བོ། མིང་གཞན་རྗེས་ལ་མངོན་རྟོགས་ཞེས་བྱ་སྟེ། བདེན་བཞིའི་གནས་ལུགས་མངོན་སུམ་དུ་རྟོགས་པ་མཐོང་ལམ་གྱི་རྗེས་ལ་སྐྱེས་པའི་མངོན་རྟོགས་ཡིན་པས་ནའོ། སྟོང་ཉིད་ཀྱི་དོན་ལ་གོམ་པ་རབ་ཀྱི་མཐར་ཕྱིན་པས་སྒྲིབ་གཉིས་ཟད་པར་པར་སྤངས་བའི་ལམ། མི་སློབ་ལམ་ཀྱི་ངོ་བོ། མིང་གཞན་བྱང་ཆུབ་ཅེས་བྱ་སྟེ། སྤང་བྱ་མ་ལུས་པ་བྱང་ཤིང། རྟོགས་བྱ་མཐའ་དག་ཁོང་དུ་ཆུབ་པས་ནའོ། ཚོགས་ལམ་ལ་ཆེ་འབྲིང་ཆུང་གསུམ་ལས། ཚོགས་ལམ་ཆུང་ངུའི་སྐབས་ན། དྲན་པ་ཉེར་བཞག་བཞི་བསྒོམ་པའོ། དྲན་པ་ཉེར་བཞག་བཞི་ནི། ལུས་དྲན་པ་ཉེ་བར་བཞག་པ། ཚོར་བ་དྲན་པ་ཉེ་བར་བཞག་པ། སེམས་དྲན་པ་ཉེ་བར་བཞག་པ། ཆོས་དྲན་པ་ཉེ་བར་བཞག་པ་བཞིའོ། ཚོགས་ལམ་འབྲིང་གི་སྐབས་སུ་ཡང་དག་སྤོང་བ་བཞི་བསྒོམ་པའོ། ཡང་དག་སྤོང་བ་བཞི་ནི། གཉེན་པོ་དགེ་བའི་ཆོས་མ་སྐྱེས་པ་བསྐྱེད་པ་དང་། སྐྱེས་པ་མི་ཉམ་ཤིང་གོང་དུ་སྤེལ་བ། མི་དགེ་བའི་ཆོས་སྐྱེས་པ་སྤོང་བ་དང་། མ་སྐྱེས་པ་མི་བསྐྱེད་པའོ། ཚོགས་ལམ་ཆེན་པོ་ལ་རྫུ་འཕྲུལ་གྱི་རྐང་པ་བཞི་བསྒོམ་མོ། རྫུ་འཕྲུལ་གྱི་རྐང་པ་བཞི་ནི། འདུན་པའི་ཏིང་ངེ་འཛིན་གྱི་རྐངཔ། དཔྱོད་པའི་ཏིང་ངེ་འཛིན་གྱི་རྐང་པ། མོས་པའི་ཏིང་ངེ་འཛིན་གྱི་རྐང་པ་དང་། སེམས་པའི་ཏིང་ངེ་འཛིན་གྱི་རྐང་དང་པ་བཞིའོ། སྦྱོར་ལམ་ལ། དྲོད། རྩེ་མོ། བཟོད་པ། ཆོས་མཆོག་ཏེ་བཞི་ལས། དྲོད་རྩེ་རྒྱུ་འབྲས་གཉིས་ལ། དབང་པོ་ལྔ་དང་ལྡན་ནོ། དབང་པོ་ལྔ་ནི། དད་པའི་དབང་པོ། བརྩོན་འགྲུས་ཀྱི་དབང་པོ། དྲན་པའི་དབང་པོ། ཏིང་ངེ་འཛིན་གྱི་དབང་པོ། ཤེས་རབ་ཀྱི་དབང་པོ་དང་ལྔའོ། བཟོད་མཆོག་རྒྱུ་འབྲས་གཉིས་ལ། སྟོབས་ལྔ་དང་ལྡན་ནོ། སྟོབས་ལྔ་ནི། དད་པའི་སྟོབས། བརྩོན་འགྲུས་ཀྱི་སྟོབས། དྲན་པའི་སྟོབས། ཏིང་ངེ་འཛིན་གྱི་སྟོབས། ཤེས་རབ་ཀྱི་སྟོབས་དང་ལྔའོ། མཐོང་ལམ་ལ་དབྱེ་ན་བཟོད་ཤེས་བཅུ་དྲུག། དེ་ན་བྱང་ཆུབ་ཀྱི་ཡན་ལག་བདུན་དང་ལྡན་ཏེ། འདུན་པ་ཡང་དག་བྱང་ཆུབ་ཀྱི་ཡན་ལག། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག། དྲན་པ་ཡང་དག་བྱང་ཆུབ་ཀྱི་ཡན་ལག། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག། ཤིན་ཏུ་སྦྱང་བ་ཡང་དག་བྱང་ཆུབ་ཀྱི་ཡན་ལག། དགའ་བ་ཡང་དག་བྱང་ཆུབ་ཀྱི་ཡན་ལག། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དང་བདུན་ནོ། སྒོམ་ལམ་ལ་དབྱེ་ན་ས་གཉིས་པ་ནས་བཅུ་པའི་བར་གྱི་སྒོམ་ལམ་སྐོར་དགུའོ། དེ་ལ་འཕགས་པའི་ལམ་ཡན་ལག་བརྒྱད་དང་ལྡན་ཏེ། ལྟ་བ་འཕགས་པའི་འཕགས་པའི་ལམ་གྱི་ཡན་ལག། རྟོགས་པ་འཕགས་པའི་ལམ་གྱི་ཡན་ལག། འཚོ་བ་འཕགས་པའི་ལམ་གྱི་ཡན་ལག། རྩོལ་བ་འཕགས་པའི་ལམ་གྱི་ཡན་ལག། དྲན་པ་འཕགས་པའི་ལམ་གྱི་ཡན་ལག། ཏིང་ངེ་འཛིན་འཕགས་པའི་ལམ་གྱི་ཡན་ལག། ངག་འཕགས་པའི་ལམ་གྱི་ཡན་ལག། ལས་ཀྱི་མཐའ་འཕགས་པའི་ལམ་གྱི་ཡན་ལག་དང་བདུན་ནོ།
ས་ཡི་ངོ་བོ། རྣམ་དཀར་ཀྱི་ཡོན་ཏན་དུ་མའི་གཞིར་གྱུར་པའི་ལམ་ཞུག་ཀྱི་མངོན་པར་རྟོགས་པའོ། སྤྱིར་ས་ཙམ་ལ་དབྱེ་བའི་སྒོ་རྣམ་པ་བཞི་སྟེ། སྐྱེ་འཕགས་ཀྱིས་དབྱེ་བ་དང་། ཐོབ་ཚུལ་གྱིས་དབྱེ་བ། གྲུབ་ཚུལ་གྱིས་དབྱེ་བ། སྤང་བྱ་ང་རྒྱལ་གྱི་སྒོ་ནས་དབྱེ་བའོ།དང་པོ་སྐྱེ་འཕགས་གི་སྒོ་ནས་དབྱེ་ན། ཚོགས་སྦྱོར་གཉིས་ནི་སོ་སྐྱེའི་ས་དང་། མཐོང་སྒོམ་གཉིས་ནི་འཕགས་པའི་སའོ། གཉིས་པ་ཐོབ་ཚུལ་གྱིས་དབྱེ་ན། ཆོས་རྣམས་ལ་མོས་པ་གཙོ་བོར་སྤྱོད་པས་འཇུག་པ་མོས་པས་ཐོབ་པའི་ས་དང་། ཆོས་སྤྱོད་བཅུ་ལ་ཇི་ལྟར་འདོད་པ་བཞིན་འཇུག་པ་སྤྱོད་པས་ཐོབ་པའི་ས། ས་དང་པོ་ཡན་ཆད་ཆོས་ཉིད་མངོན་སུམ་དུ་ཤེས་པ་རྟོགས་པས་ཐོབ་པའི་ས་དང་། ཁྱད་པར་དུ་ས་བརྒྱད་པ་ཡན་ཆད་འབད་མེད་ལྷུན་གྲུབ་ཏུ་འཇུག་པས་གྲུབ་པས་ཐོབ་པའི་ས་ཞེས་བྱ་བ་སྟེ། མདོ་སྡེ་རྒྱན་ལས། ས་ཐོབ་པ་ནི་མོས་དང་། སྤྱོད་པ་དག་ལ་འཇུག་པ་དང་། རྟོགས་པའི་ཕྱིར་དང་ས་རྣམས་ནི། གྲུབ་པའི་སྒོ་ནས་རྣམ་པ་བཞི། ཞེས་སོ། གསུམ་པ་གྲུབ་ཚུལ་གྱི་སྒོ་ནས་དབྱེ་ན། ཚོགས་སྦྱོར་གྱི་གནས་སྐབས་མོས་པས་སྤྱོད་པའི་ས་ནི་མ་གྲུབ་པ་དང་། མཐོང་སྒོམ་གྱི་གནས་སྐབས་ལྷག་བསམ་རྣམ་དག་གི་ས་ནི་གྲུབ་པ་དང་། གྲུབ་པ་ལའང་དང་པོ་ནས་བདུན་པའི་བར་ནི་འབད་རྩོལ་དང་བཅས་པའི་ཆ་ནས་མ་གྲུབ་པ་དང་། བརྒྱད་པ་ཡན་ཆད་འབད་རྩོལ་མེད་པའི་ཕྱིར་གྲུབ་པ་ཞེས་བྱ་བ་རྣམ་པ་བཞི་ཏེ། མདོ་སྡེ་རྒྱན་ལས། ས་རྣམས་ཐམས་ཅད་མ་གྲུབ་དང་། གྲུབ་པ་དག་ཏུ་ཤེས་པར་བྱ། གྲུབ་པ་དག་ཀྱང་མ་གྲུབ་དང་། གྲུབ་པ་དག་ཏུ་ཡང་འདོད་དོ། ཞེས་གསུངས་སོ། བཞི་པ་སྤང་བྱ་ང་རྒྱལ་གྱི་སྒོ་ནས་དབྱེ་ན། མོས་པས་སྤྱོད་པའི་ས་ང་རྒྱལ་མང་བ་དང་། མ་དག་ས་བདུན་ང་རྒྱལ་ཕྲ་བ་དང་། དག་པ་ས་གསུམ་ང་རྒྱལ་མེད་པ་དང་གསུམ་སྟེ། དེ་ཉིད་ལས། ང་རྒྱལ་མང་དང་ང་རྒྱལ་ཕྲ། ང་རྒྱལ་མེད་པ་དག་ཏུ་འདོད། ཅེས་གསུངས་པ་ལྟར་རོ། བྱེ་བྲག་འཕགས་སའི་ངོ་བོ་ནི། རྨད་དུ་བྱུང་བའི་ཡོན་ཏན་རྒྱ་མཚོ་ལྟ་བུའི་གཞི་རྟེན་དུ་གྱུར་པའི་འཕགས་རྒྱུད་ཀྱི་མངོན་པར་རྟོགས་པ་དེའོ། ངེས་ཚིགས་ནི། འཇིག་རྟེན་ན་སས་རྩི་ཤིང་ནགས་ཚལ་སོགས་བསྐྱེད་ཅིང་སྣ་ཚོགས་པའི་རིན་པོ་ཆེའི་གཏེར་འཛིན་པ་བཞིན་དུ་འཕགས་རྒྱུད་ཀྱི་མངོན་པར་རྟོགས་པ་འདི་དག་གིས་ཀྱང་རྣམ་དཀར་ཀྱི་འབྲས་བུ་ཚད་མེད་པ་བསྐྱེད་ཅིང་སྤངས་བ་དང་རྟོགས་པའི་ཡོན་རྟེན་རིན་པོ་ཆེའི་གཏེར་འཛིན་པས་ན་ས་ཞེས་བརྗོད་དོ། དབྱེ་ན་མཐོང་ལམ་ནས་རྒྱུན་མཐའི་བར་གྱིས་བསྡུས་པའི་ས་བཅུའོ། དེ་ཡང་སྤངས་བྱ་ལ་ཀུན་བརྟགས་དང་ལྷན་སྐྱེས་གཉིས་སུ་ངེས་པའི་རྒྱུ་མཚན་གྱིས་དེ་སྤོང་བྱེད་ཀྱི་གཉེན་པོ་ལ་ཡང་མཐོང་སྒོམ་གཉིས་སུ་གྲངས་ངེས་པའོ། ཡང་སྤངས་བྱ་ཀུན་བཏགས་ནི་གནས་ཚུལ་མཐོང་བ་ཙམ་གྱིས་སྤོང་བས་ན་དེའི་གཉེན་པོ་མཐོང་ལམ་ལ་དབྱེ་བ་མེད་ཅིང་། སྤངས་བྱ་ལྷན་སྐྱེས་ནི་ཡུན་རིང་གོམ་པའི་སྟོབས་ཀྱིས་སྤོང་བས་ན་སྤངས་བྱ་ལ་སྐོར་དགུའི་དབྱེ་བ་འབྱུང་བ་བཞིན་དེ་སྤོང་བྱེད་ཀྱི་གཉེན་པོ་ལ་ཡང་སྒོམ་ལམ་སྐོར་དགུ་ཡོད་དོ། ཡང་ན་རྟོགས་པའི་ཡོན་ཏན་ཕར་ཕྱིན་བཅུའི་གྲངས་ཀྱིས་ས་བཅུར་ངེས་པ་སྟེ། ས་དང་པོར་སྦྱིན་པའི་ཕར་ཕྱིན་དང་གཉིས་པར་ཚུལ་ཁྲིམས་ཀྱི་ཕར་ཕྱིན་ལྷག་པ་ནས་བཅུ་པར་ཡེ་ཤེས་ཀྱི་ཕར་ཕྱིན་ལྷག་པའི་བར་དུའོ། ས་བཅུའི་ངོ་བོ་དང་ཡོན་རྟེན་རིམ་གྱིས་བཤད་པ་ལ། ས་དང་པོའི་ངོ་བོ། སྤངས་བྱ་ཀུན་བརྟགས་ཀྱི་གཉེན་པོ་དང་ཡོན་རྟེན་བརྒྱ་ཕྲག་བཅུ་གཉིས་ཀྱི་རྟེན་བྱེད་པའི་འཕགས་རྒྱུད་ཀྱི་མངོན་རྟོགས། མིང་གི་ཁྱད་པར་རབ་ཏུ་དགའ་བའོ། ངེས་ཚིགས་གི་ཁྱད་པར་ནི། ས་དེ་ཐོབ་པས་བྱང་ཆུབ་ལ་ཉེ་བ་དང་སེམས་ཅན་གྱི་དོན་རྒྱ་ཆེན་པོ་རང་སྟོབས་ཀྱིས་དངོས་སུ་བསྒྲུབ་ནུས་པར་མཐོང་བས། སེམས་ལ་སྔར་མེད་ཀྱི་དགའ་བ་རྒྱ་ཆེན་པོ་འབྱུང་བས་ན་རབ་ཏུ་དགའ་བ་ཞེས་བྱ་སྟེ། མདོ་སྡེ་རྒྱན་ལས། བྱང་ཆུབ་ལ་ནི་ཉེ་བ་དང་། སེམས་ཅན་དོན་འགྲུབ་མཐོང་བས་ན། རབ་ཏུ་དགའ་བ་སྐྱེ་འགྱུར་སྟེ། དེ་ཕྱིར་རབ་དགའ་ཞེས་བརྗོད་དོ། ཞེས་གསུངས། ས་དེ་ལ་ཡོན་རྟེན་གྱི་ཁྱད་པར་དུ་མ་ཞིག་ཡོད་པ་ལས། ཐོག་མར་ཕར་ཕྱིན་ལྷག་པའི་ཁྱད་པར་ནི། ས་དེར་ཕར་ཕྱིན་དྲུག་ཀ་དང་ལྡན་ན་ཡང་ལྟོས་འཇོག་ཀྱིས་སྦྱིན་པའི་ཕར་ཕྱིན་ཆེས་ལྷག་པར་འབྱུང་བ་སྟེ། མདོ་སྡེ་ས་བཅུ་པ་ལས། ཕ་རོལ་ཏུ་ཕྱིན་པ་བཅུ་པོ་དག་ལས། དེ་སྦྱིན་པའི་ཕ་རོལ་ཏུ་ཕྱིན་པ་ཆེས་ཤས་ཆེ་བ་ཡིན་ཏེ། ལྷག་མ་རྣམས་ཀྱང་མི་བསྒྲུབ་པ་ནི་མ་ཡིན་ནོ། ཞེས་གསུངས་སོ། སྐྱེ་བ་འཛིན་པའི་ཁྱད་པར། ས་དང་པོ་ལ་གནས་པའི་བྱང་ཆུབ་སེམས་དཔའ་དེ། ཕལ་ཆེར་འཛམ་བུའི་གླིང་ལ་དབང་བའི་རྒྱལ་པོར་གྱུར་ནས་དབུལ་བའི་སྡུག་བསྔལ་སེལ་བ་སོགས་སེམས་ཅན་གྱི་དོན་མཛད་པ་སྟེ། རིན་ཆེན་ཕྲེང་བ་ལས། དེ་ཡི་རྣམ་པར་སྨིན་པས་ནི། འཛམ་གླིང་དབང་ཕྱུག་ཆེན་པོར་འགྱུར། ཞེས་སོ། མཐོང་བའི་ཁྱད་པར། དུས་སྐད་ཅིག་ཡུད་ཙམ་ལ་སངས་རྒྱས་རྒྱའི་ཞལ་མཐོང་བ་དང་། དེ་དག་གིས་བྱིན་གྱིས་བརླབས་པའང་ཤེས་སོ། རྫུ་འཕྲུལ་གྱི་ཁྱད་པར། འཇིག་རྟེན་གྱི་ཁམས་བརྒྱ་གཡོ་བར་བྱེད་པ་དང་། དེ་དག་འོད་ཀྱིས་སྣང་བར་བྱེད་པ། སངས་རྒྱས་ཀྱི་ཞིང་བརྒྱར་འགྲོ་བ་དང་། རང་གི་ལུས་བརྒྱ་ཕྲག་ཏུ་སྤྲུལ་ནུས་པའོ། རྨི་ལམ་གྱི་ཁྱད་པར། རྗེས་ཐོབ་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཏེར་ཆེན་པོ་བྱེ་བ་ཕྲག་ཁྲིག་བརྒྱ་སྟོང་གིས་ཡོངས་སུ་གང་བར་རྨི་བའོ། སྙོམས་པར་འཇུག་པའི་ཁྱད་པར། ཏིང་ངེ་འཛིན་གྱི་སྒོ་བརྒྱ་ཐོབ་ཅིང་དུས་སྐད་ཅིག་ཡུད་ཙམ་རེར་ཡང་དེ་དག་ལ་སྙོམས་པར་འཇུག་པའོ། ཆོས་སྟོན་པའི་ཁྱད་པར། དུས་དེ་ཙམ་ལ་ཆོས་ཀྱི་སྒོ་བརྒྱ་འབྱེད་ཅིང་སེམས་ཅན་བརྒྱ་སྨིན་པར་བྱེད་དོ། རྟོགས་པའི་ཁྱད་པར། དེས་བདག་གཞན་མཉམ་པ་ཉིད་དུ་གཟིགས་པས་ཆོས་དབྱིངས་རྒྱུད་ཐམས་ཅད་ལ་ཀུན་དུ་འགྲོ་བའི་དོན་དུ་རྟོགས་པའོ། སྤངས་བའི་ཁྱདཔར། སྤང་བྱ་ཀུན་བརྟགས་ཀྱི་ཆ་མ་ལུས་པ་སྤོང་བའོ། རྣམ་པར་དག་པའི་ཁྱད་པར། ས་བཅུ་པ་ལས། དཔེར་ན་གསེར་ས་ལེ་སྦྲམ་དེ་ཉིད་གསེར་མགར་མཁས་པ་དག་གིས་ཅི་ཙམ་ཅི་ཙམ་མེར་བསྲེགས་པ། དེ་ཙམ་དེ་ཙམ་དུ་བྱང་བ་དང་ཡོངས་སུ་དག་པ་དང་། ཅི་དགར་ལས་སུ་རུང་བར་འགྱུར་རོ། དེ་བཞིན་དུ་ས་དང་པོ་ལ་གནས་པའི་བྱང་ཆུབ་སེམས་པ་དེའི་དགེ་བའི་རྩ་བ་ཡང་རབ་ཏུ་བྱང་བ་དང་ཡོངས་སུ་དག་པ་དང་། ཅི་དགར་ལས་སུ་རུང་བར་འགྱུར་རོ། ཞེས་སོ། ཡོངས་སུ་བསྲུང་བའི་ཁྱད་པར། རིན་ཆེན་ཡང་དག་འཆགས་ཅེས་བྱ་བའི་ཏིང་ངེ་འཛིན་གྱིས་ཐོབ་ཅིང་བྱིན་གྱིས་བརླབས་པ་ཞེས་བྱ་བའི་གཟུངས་ཀྱིས་སྲུང་བའོ། ཡོངས་སུ་སྦྱང་བའི་ཁྱད་པར་ནི། གཞི་ཐམས་ལ་ལ་གྱ་གྱུ་མེད་པའི་བསམ་པ་སོགས་ཆོས་བཅུ་ལ་སྦྱང་པས་ས་དེ་ཐོབ་ཅིང་རྣམ་པར་དག་པར་འགྱུར་ཏེ། མངོན་རྟོགས་རྒྱན་ལས་གྱ་གྱུ་མེད་སེམས་སྦྱང་བ་དང་། ཞེས་སོགས་གསུངས་པ་ལྟར་རོ།
ས་གཉིས་པའི་ངོ་བོ། དུས་སྐད་ཅིག་རེར་སངས་རྒྱས་སྟོང་གི་ཞལ་མཐོང་བ་དང་ཏིང་ངེ་ཀྱི་སྒོ་སྟོང་ལ་སྙོམས་པར་འཇུག་པ་སོགས་ཡོན་ཏན་དུ་མའི་གཞིར་གྱུར་པའི་འཕགས་རྒྱུད་ཀྱི་མངོན་རྟོགས། མིང་གི་ཁྱད་པར་དྲི་མ་མེད་པའོ། ངེས་ཚིག་གི་ཁྱད་པར། ས་འདིར་ཚུལ་ཁྲིམས་ཀྱི་ཕར་ཕྱིན་ལྷག་པར་འབྱུང་བས་ན་འཆལ་བའི་ཚུལ་ཁྲིམས་དང་། ཐེག་དམན་ཡིད་ལ་བྱེད་པར་དོགས་པའི་རྩོལ་བའི་དྲི་མ་ཕྲ་མོ་ཙམ་ཡང་མེད་པས་ན་དྲི་མ་མེད་པའི་ས་ཞེས་བྱ་སྟེ། མདོ་སྡེ་རྒྱན་ལས། འཆར་ཚུལ་རྩོལ་བའི་དྲི་བྲལ་ཕྱིར། དྲི་མ་མེད་པའི་ས་ཞེས་བྱ། ཞེས་དང། རིན་ཆེན་ཕྲེང་བ་ལས། ལུས་དང་ངག་དང་སེམས་ཀྱི་ལས། བཅུ་ཆར་དྲི་མ་མེད་པའི་ཕྱིར། ཞེས་གསུངས། སྐྱེ་བའི་ཁྱད་པར། ས་འདི་ལ་གནས་པའི་བྱང་ཆུབ་སེམས་དཔའ་དེ་ཕལ་ཆེར་གླིང་བཞི་ལ་དབང་བའི་འཁོར་ལོས་བརྒྱུར་བའི་རྒྱལ་པོར་གྱུར་ནས་སེམས་ཅན་རྣམས་མི་དགེ་བ་ལས་བཟློག་ནས་དགེ་བཅུའི་ལམ་ལ་འགོད་པར་མཛད་པ་སྟེ། དེ་ཡི་རྣམ་པར་སྨིན་པས་ནི། དཔལ་ལྡན་རིན་ཆེན་བདུན་དག་གི། འགྲོ་ཕན་འཁོར་ལོས་བསྒྱུར་བར་འགྱུར། ཞེས་པ་བཞིན་ནོ། ཕར་ཕྱིན་ལྷག་པའི་ཁྱད་པར། ཕར་འདིར་ཕར་ཕྱིན་དྲུག་ཀ་ལྡན་ན་ཡང་ལྟོས་འཇོག་ཀྱིས་ཚུལ་ཁྲིམས་ཀྱི་ཕར་ཕྱིན་ལྷག་པར་འབྱུང་བའོ། མཐོང་བའི་ཁྱད་པར། དུས་སྐད་ཅིག་ཡུད་ཙམ་ལ་སངས་རྒྱས་སྟོང་གི་ཞལ་མཐོང་བའོ། རྫུ་འཕྲུལ་གྱི་ཁྱད་པར། རང་གི་ལུས་སྟོང་དུ་སྤྲུལ་པ་དང་། སངས་རྒྱས་ཀྱི་སྟོང་དུ་འགྲོ་བ། འཇིག་རྟེན་གྱི་ཁམས་སྟོང་གཡོ་བ་དང་དེ་དག་འོད་ཀྱིས་སྣང་བར་བྱེད་ནུས་པའོ། རྨི་ལམ་གྱི་ཁྱད་པར། རྗེས་ཐོབ་ཏུ་སྟོང་གསུམ་ལག་མཐིལ་ལྟར་མཉམ་པ་ལ་རིན་པོ་ཆེ་དུ་མས་ལེགས་པར་བརྒྱན་པ་རྨི་བའོ། སྙོམས་པར་འཇུག་པའི་ཁྱད་པར། དུས་སྐད་ཅིག་མ་གཅིག་ལ་ཏིང་ངེ་འཛིན་གྱི་སྒོ་མི་འདྲ་བ་སྟོང་ལ་སྙོམས་པར་འཇུག་གོ། ཆོས་སྟོན་པའི་ཁྱད་པར། དུས་དེ་ཙམ་ལ་ཆོས་ཀྱི་ སྒོ་མི་འདྲ་བ་སྟོང་འབྱེད་པ་དང་། སེམས་ཅན་སྟོང་སྨིན་པར་བྱེད་དོ། རྟོགས་པའི་ཁྱད་པར། རྡུལ་དང་འདྲེས་པའི་གསེར་བཞིན་ཆོས་ཀྱི་དབྱིངས་མཆོག་གི་དོན་དུ་རྟོགས་པས་རྣམ་པ་ཐམས་དུ་བདག་གིས་ཡོངས་སུ་སྦྱང་བ་ལ་བརྩོན་པར་བྱའོ་སྙམ་དུ་སེམས་སོ། དེ་ལྟར་ཡང་དབུས་མཐའ་ལས། ཀུན་ཏུ་འགྲོ་དོན་མཆོག་གི་དོན། ཞེས་སོ། སྤོང་བའི་ཁྱད་པར། སྒོམ་སྤང་ཆེ་སྐོར་གསུམ་ལས་འབྲིང་སྤོང་བའོ། རྣམ་པར་དག་པའི་ཁྱད་པར། རྒྱུ་གསུམ་གྱིས་དགེ་བའི་རྩ་བ་རྒྱ་ཆེ་བ་རྣམ་པར་དག་པར་འགྱུར་ཏེ། དཔེར་ན་གསེར་ས་ལེ་སྦྲམ་དེ་ཉིད་གསེར་མགར་དག་གིས་མཚུར་གྱིས་བཀུས་ནས་མེར་བཅུག་ན། དེ་བས་ཀྱང་དྲི་མ་ཐམས་ཅད་དང་བྲལ་བར་འགྱུར་རོ། དེ་བཞིན་དུ་ས་གཉིས་པ་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་ནི། སྔར་བས་ཀྱང་ཆེས་རྣམ་པར་དག་པ་དང་། བྱང་བ་དང་ལས་སུ་རུང་བར་འགྱུར་རོ། ཞེས་གསུངས་སོ། རྨི་ལམ་གྱི་ཁྱད་པར། རྗེས་ཐོབ་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཏེར་བྱེ་བ་ཕྲག་ཁྲིག་བརྒྱ་སྟོང་གིས་ཡོངས་སུ་གང་བར་རྨི་བའོ། ཡོངས་སུ་སྦྱོང་བའི་ཁྱད་པར་། ཚུལ་ཁྲིམས་དང་། བྱས་པ་གཟོ་བ་སོགས་ཡོངས་སུ་སྦྱོང་བ་བཅུས་ས་དེ་ཐོབ་ཅིང་རྣམ་པར་དག་འགྱུར་བའོ། ཡོངས་སུ་བསྲུང་བའི་ཁྱད་པར། གནས་མེད་པའི་ཏིང་ངེ་འཛིན་གྱིས་ཐོབ་ཅིང་། གནས་ཀྱིས་མི་ཐུབ་པ་ཞེས་བྱ་བའི་གཟུངས་ཀྱིས་བསྲུང་ངོ།
ས་གསུམ་པའི་ངོ་བོ། སངས་རྒྱས་འབུམ་གྱི་ཞལ་མཐོང་བ་དང་ཏིང་ངེ་འཛིན་གྱི་སྒོ་འབུམ་ཕྲག་ལ་སྙོམས་པར་འཇུག་པ་སོགས་ཡོན་ཏན་བརྒྱ་ཕྲག་དུ་མའི་གཞིར་གྱུར་པའི་འཕགས་རྒྱད་ཀྱི་མངོན་པར་རྟོགས་པའོ། མིང་གི་ཁྱད་པར་འོད་བྱེད་པའོ། ངེས་ཚིག་གི་ཁྱད་པར། ས་འདིར་རང་གི་ལུས་སྲོག་ལ་མི་བལྟ་བར་ཆོས་འཚོལ་བས་རང་ངོས་ནས་ཤེས་རབ་དང་ཏིང་ངེ་འཛིན་གྱི་སྣང་བ་གསལ་བདང་། གཞན་དག་ལ་ཆོས་ཀྱི་སྣང་བ་ཆེན་པོ་བྱེད་པའི་ཕྱིར་ན་འོད་བྱེད་པ་ཏེ། མདོ་སྡེ་རྒྱན་ལས། ཆོས་ཀྱི་སྣང་བ་ཆེན་པོ་ནི། བྱེད་པའི་ཕྱིར་ན་འོད་བྱེད་པའོ། ཞེས་དང་། རིན་ཆེན་ཕྲེང་བ་ལས། ས་གསུམ་པ་ནི་འོད་བྱེད་པ། ཡེ་ཤེས་ཞི་བའི་འོད་འབྱུང་ཕྱིར། ཞེས་གསུངས། ཡང་ན་ས་དྲུག་པའི་ཤེར་ཕྱིན་ཤེས་སྒྲིབ་ཀྱི་བུད་ཤིང་བསྲེགས་པའི་ཡེ་ཤེས་ཀྱི་མེའི་སྔ་ལྟས་སྣང་བ་ཟང་ཀྱི་འོད་ལྟར་འབྱུང་བས་ན་འོད་བྱེད་པ་ཏེ། དབུ་མ་འཇུག་པ་ལས། ཤེས་བྱའི་བུད་ཤིང་མ་ལུས་བསྲེགས་པའི་མེའི། འོད་འབྱུང་ཕྱིར་ན་ས་ནི་གསུམ་འདི། འོད་བྱེད་པ་སྟེ་བདེ་གཤེགས་སྲས་པོ་ལ། དེ་ཚེ་ཉི་ལྟར་ཟང་འདྲའི་སྣང་བ་འབྱུང་། ཞེས་སོ། སྐྱེ་བའི་ཁྱད་པར། ས་འདི་ལ་གནས་པའི་བྱང་སེམས་ཕལ་ཆེ་བ་ལྷ་ཡི་དབང་པོ་བརྒྱ་བྱིན་དུ་གྱུར་ནས་སེམས་ཅན་རྣམས་ཀྱི་འདོད་པའི་ཆགས་པ་བཟློག་པར་མཛད་པ་སྟེ། རིན་ཕྲེང་ལས། འདོད་པའི་འདོད་ཆགས་བཟློག་པ་ཡིན། ཞེས་སོ། མཐོང་བའི་ཁྱད་པར། དུས་སྐད་ཅིག་ཡུད་ཙམ་ལ་སངས་རྒྱས་འབུམ་གྱི་ཞལ་མཐོང་ངོ་། རྫུ་འཕྲུལ་གྱི་ཁྱད་པར། རང་གི་ལུས་འབུམ་དུ་སྤྲུལ་བ་དང་སངས་རྒྱས་ཀྱི་ཞིང་འབུམ་ལ་འགྲོ་བ། འཇིག་རྟེན་གྱི་ཁམས་འབུམ་གཡོ་བ་དང་དེ་དག་འོད་ཀྱིས་སྣང་བར་བྱེད་ནུས་པའོ། རྨི་ལམ་གྱི་ཁྱད་པར། རྗེས་ཐོབ་ཏུ་རང་ཉིད་དཔའ་ཞིང་བརྟན་ལ་མཚོན་ཆ་དང་གོ་ཆ་ཐོག་ཏེ་ཕལ་རྒོལ་མཐའ་དག་འདུལ་བར་རྨི་བའོ། སྙོམས་པར་འཇུག་པའི་ཁྱད་པར། དུས་སྐད་ཅིག་ལ་ཏིང་ངེ་འཛིན་གྱི་སྒོ་མི་འདྲ་བ་འབུམ་ལ་སྙོམས་པར་འཇུག་པའོ། ཆོས་སྟོན་པའི་ཁྱད་པར། དུས་སྐད་ཅིག་རེར་ཆོས་ཀྱི་སྒོ་མི་འདྲ་བ་འབུམ་འབྱེད་པ་དང་སེམས་ཅན་འབུམ་ཕྲག་སྨིན་པར་བྱེད་དོ། རྟོགས་པའི་ཁྱད་པར། ས་གསུམ་པར་ཆོས་ཀྱི་དབྱིངས་དེ་རྒྱུ་མཐུན་པས་ཐོབ་པའི་དོན་གྱི་མཆོག་ཏུ་རྟོགས་པས་ན། དེ་དངོས་རྒྱུད་ཀྱིས་བརྗོད་བྱར་བྱས་པའི་ཚིགས་སུ་བཅད་པ་རེ་རེའི་ཕྱིར་ཡང་སྟོང་གསུམ་མེ་འོབ་ཀྱི་ནང་དུ་བདག་ཉིད་མཆོང་ཞིང་བརྒལ་བར་བྱེད་དོ། དེ་ལྟར་ཡང་དབུས་མཐའ་ལས། རྒྱུ་མཐུན་དོན་གྱི་མཆོག་ཉིད་དང་། ཞེས་གསུངས་སོ། སྤོང་བའི་ཁྱད་པར། ཆོས་དབྱིངས་རྒྱུ་མཐུན་པའི་དོན་དུ་མ་རྟོགས་པའི་གནས་ངན་ལེན་ནམ་སྒོམ་སྤོང་ཆེ་སྐོར་གསུམ་གྱི་ཆུང་ངུ་སྤོང་བའོ། རྣམ་པར་དག་པའི་ཁྱད་པར། དཔེར་ན་གསེར་ས་ལེ་སྦྲམ་དེ་ཉིད་གསེར་མགར་མཁས་པའི་ལག་ཏུ་བསྲེལ་བ་ན། དང་པོའི་སྲང་གྲངས་ཀྱི་ཚད་ལས་ཉུང་དུ་མི་འགྲོ་བར། སྐྱོན་དང་དྲི་མ་ཐམས་ཅད་ཟད་པར་བྱེད་དོ། དེ་བཞིན་དུ་ས་གསུམ་པ་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་མི་འགྲིབ་པར་གནས་ཤིང་། ཤིན་ཏུ་དག་དང་བྱང་བ་དང་ལས་སུ་རུང་བར་འགྱུར་རོ། ཞེས་སོ། ཡོངས་སུ་སྦྱངས་བའི་ཁྱད་པར། ཐོས་པས་མི་ངོམས་པ་ལ་སོགས་པ་ཆོས་ལྔ་ལ་བསླབ་པས་ས་དེ་ཐོབ་ཅིང་རྣམ་པར་དག་པར་འགྱུར་བ་སྟེ། ཐོས་པས་མི་ངོམས་ཉིད་དང་ནི། ཟང་ཟིང་མེད་པར་ཆོས་སྦྱིན་དང་། ཞེས་སོགས་གསུངས་པ་ལྟ་བུའོ།
ས་བཞི་པའི་ངོ་བོ། སངས་རྒྱས་བྱེ་བ་ཕྲག་བརྒྱའི་ཞལ་མཐོང་ཞིང་ཏིང་ངེ་འཛིན་གྱི་སྒོ་བྱེ་བ་ཕྲག་བརྒྱ་ལ་སྙོམས་པར་འཇུག་པ་སོགས་ཡོན་ཏན་དུ་མའི་གཞིར་གྱུར་པའི་འཕགས་རྒྱུད་ཀྱི་མངོན་རྟོགས། མིང་གི་ཁྱད་པར་འོད་འཕྲོ་བའོ། ངེས་ཚིག་གི་ཁྱད་པར། ས་དེར་སྒྲིབ་གཉིས་བསྲེག་པར་བྱེད་པ་ཡེ་ཤེས་ཀྱི་མེའི་འོད་འཕྲོ་བས་ན་མིང་དེ་སྐད་སྨོས་པ་ཏེ། རིན་ཆེན་ཕྲེང་བ་ལས། འདི་ལྟར་བྱང་ཆུབ་མི་མཐུན་ཆོས། རབ་ཏུ་བསྲེགས་བྱེད་འོད་ལྟ་བུ། དེ་དང་ལྡན་ཕྱིར་ས་དེ་ནི། གཉིས་པོ་བསྲེག་པས་འོད་འཕྲོ་ཅན། ཞེས་གསུངས། ཕར་ཕྱིན་ལྷག་པའི་ཁྱད་པར། ས་དེར་ཕར་ཕྱིན་དྲུག་ཀ་ལྡན་མོད་ལྟོས་འཇོག་གིས་བཙོན་འགྲུས་ཀྱི་ཕར་ཕྱིན་ལྷག་པར་འབྱུང་བའོ། སྐྱེ་བའི་ཁྱད་པར། ས་འདི་ལ་གནས་པའི་བྱང་ཆུབ་སེམས་དཔའ་ཕལ་ཆེ་བ་ལྷའི་རྒྱལ་པོ་རབ་འཐབ་བྲལ་དུ་གྱུར་ནས་སེམས་ཅན་རྣམས་ཀྱི་འཇིགས་ཚོགས་ཀྱི་ལྟ་བ་འཇོམ་པར་བྱེད་པ་སྟེ། ཇི་སྐད་དུ། རབ་འཐབ་བྲལ་གནས་ལྷ་རྒྱལ་འགྱུར། འཇིག་ཚོགས་ལྟ་བ་རབ་འབྱུང་བ། ཀུན་ནས་འཇོམ་བྱེད་མཁས་པ་ཡིན། ཞེས་སོ། མཐོང་བའི་ཁྱད་པར། སངས་རྒྱས་བྱེ་བ་ཕྲག་བརྒྱའི་ཞལ་མཐོང་བའོ། རྫུ་འཕྲུལ་གྱི་ཁྱད་པར། རང་གི་ལུས་བྱེ་བ་ཕྲག་བརྒྱར་སྤྲུལ་ཅིང་། སངས་རྒྱས་ཀྱི་ཞིང་བྱེ་བ་ཕྲག་བརྒྱར་འགྲོ་བ། འཇིག་རྟེན་གྱི་ཁམས་བྱེ་བ་ཕྲག་བརྒྱ་གཡོ་ཞིང་དེ་དག་འོད་ཀྱིས་སྣང་བར་བྱེད་པའོ། རྨི་ལམ་གྱི་ཁྱད་པར། ཕྱོགས་བཞི་ནས་རླུང་གི་དཀྱིལ་འཁོར་བཞིས་ཐམས་ཅད་དང་ལྡན་པའི་ས་ཆེན་པོ་ལ་མེ་ཏོག་སྣ་ཚོགས་འཐོར་བར་རྨི་བའོ། སྙོམས་པར་འཇུག་པའི་ཁྱད་པར། དུས་སྐད་ཅིག་ཡུད་ཙམ་རེར་ཡང་ཏིང་ངེ་འཛིན་གྱི་སྒོ་བྱེ་བ་ཕྲག་བརྒྱར་སྙོམས་པར་འཇུག་པའོ། ཆོས་སྟོན་པའི་ཁྱད་པར། དུས་སྐད་ཅིག་མ་ཅིག་ལ། ཆོས་ཀྱི་སྒོ་བྱེ་བ་ཕྲག་བརྒྱ་འབྱེད་ཅིང་སེམས་ཅན་བྱེ་བ་ཕྲག་བརྒྱ་སྨིན་པར་བྱེད་པའོ། རྟོགས་པའི་ཁྱད་པར། ཆོས་ཀྱི་དབྱིངས་འཛིན་པ་མེད་པའི་དོན་དུ་རྟོགས་པས་ལུང་གི་ཆོས་ལ་ཡང་འཛིན་པ་ལྡོག་པར་མཛད་པ་སྟེ། ཡོངས་སུ་འཛིན་པ་མེད་དོན་དང་། ཞེས་གསུངས། སྤོང་བའི་ཁྱད་པར། ཆོས་དབྱིངས་འཛིན་པའི་གནས་ཅན་དུ་རྟོག་པའི་གནས་ངན་ལེན་ནམ་སྒོམ་སྤོང་འབྲིང་སྐོར་གསུམ་ལས་འབྲིང་གི་ཆེན་པོ་སྤོང་བའོ། རྣམ་པར་དག་པའི་ཁྱད་པར། རྒྱུ་གསུམ་གྱིས་དགེ་བའི་རྩ་བ་རྣམས་རྒྱ་ཆེར་རྣམ་པར་དག་པར་འགྱུར་ཏེ། དཔེར་ན་གསེར་ས་ལེ་སྦྲམ་དེ་ཉིད་གསེར་མགར་མཁས་པས་བྱི་དོར་བྱས་པ་དེ་ལ། རིན་པོ་ཆེ་སྤུག་གིས་སྤྲས་ན་མཚུངས་པ་མེད་པའི་ཕྱིར་དེ་མ་ཡིན་པའི་གསེར་དག་གིས་མི་འཕྲོག་པ་ཡིན་ནོ། དེ་བཞིན་དུ་ས་ལྔ་པ་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་ཡང་ཐབས་དང་ཤེས་རབ་ཀྱི་དཔྱད་པས་རྣམ་པར་དག་སྟེ། ས་འོག་མ་ལ་གནས་པའི་བྱང་ཆུབ་སེམས་དཔའི་དགེ་རྩས་མི་འཕྲོགས་པ་ཡིན་ནོ། ཞེས་གསུངས་སོ། ཡོངས་སུ་སྲུང་བའི་ཁྱད་པར། ཕྱིར་མི་ལྡོག་པའི་ཏིང་ངེ་འཛིན་དང་། རབ་ཏུ་གནས་པའི་གཟུངས། གདུལ་དཀའ་བའི་གཟུངས་བཅས་ཀྱིས་བསྲུང་བའོ། ཡོངས་སུ་སྦྱོང་བའི་ཁྱད་པར། དགོན་པར་གནས་པ་སོགས་ཆོས་བཅུ་ལ་སྤྱད་པས་ས་དེ་ཡོངས་སུ་ཐོབ་པ་དང་རྣམ་པར་དག་པར་འགྱུར་ཏེ། ནགས་གནས་འདོད་ཆུང་ཆོག་ཤེས་དང་། ཞེས་སོ།
ས་ལྔ་པའི་ངོ་བོ། སངས་རྒྱས་བྱེ་བ་ཕྲག་སྟོང་གི་ཞལ་མཐོང་ཞིང་ཏིང་ངེ་འཛིན་གྱི་སྒོ་བྱེ་བ་ཕྲག་སྟོང་ལ་སྙོམས་པར་འཇུག་པ་སོགས་ཡོན་ཏན་དུ་མའི་གཞིར་གྱུར་པའི་འཕགས་རྒྱུད་ཀྱི་མངོན་པར་རྟོགས་པ། མིང་གི་ཁྱད་པར་སྦྱང་དཀའ་བའོ། ངེས་ཚིག་གི་ཁྱད་པར། ས་དེར་གང་ཟག་མི་སྲུན་པ་འགའ་རེས་དྲིན་ལག་པར་མཇལ་བ་ལྟ་བུ་ལོག་བསྒྲུབ་བྱས་ན་ཡང་སེམས་འཁྲུག་ཅིང་ཉོན་མོངས་པར་མི་འགྱུར་བས་ན་སྦྱང་དཀའ་འམ་བསྐྱོད་དཀའ་བའོ། ས་དེར་ཕར་ཕྱིན་དྲུག་ཀ་ལྡན་ན་ཡང་ལྟོས་འཇོག་གིས་བསམ་གཏན་གྱི་ཕར་ཕྱིན་ཆེས་ལྷག་པར་འབྱུང་བའོ། སྐྱེ་བ་འཛིན་པའི་ཁྱད་པར། ས་འདིའི་བྱང་སེམས་ཕལ་ཆེ་བ་དགའ་ལྡན་གནས་ཀྱི་ལྷ་ཡི་བདག་པོར་གྱུར་ནས། མུ་སྟེགས་ཀྱི་ལྟ་བ་བཟློག་པར་མཛད་ཏེ། རིན་ཆེན་ཕྲེང་བ་ལས། དེ་ཡི་རྣམ་པར་སྨིན་པས་ནི། དགའ་ལྡན་གནས་ཀྱི་ལྷ་རྒྱལ་འགྱུར། མུ་སྟེག་བྱེད་པ་ཐམས་ཅད་ཀྱི། ཉོན་མོངས་ལྟ་གནས་བཟློག་པར་བྱེད་། ཅེས་སོ། མཐོང་བའི་ཁྱད་པར་དུས་སྐད་ཅིག་ལ་སངས་རྒྱས་བྱེ་བ་ཕྲག་སྟོང་གི་ཞལ་མཐོང་བའོ། རྫུ་འཕྲུལ་གྱི་ཁྱད་པར། རངགི་ལུས་བྱེ་བ་ཕྲག་སྟོང་དུ་སྤྲུལ་བ་དང་། སངས་རྒྱས་ཀྱི་ཞིང་བྱེ་བ་ཕྲག་སྟོང་དུ་འགྲོ་བ། འཇིག་རྟེན་གྱི་ཁམས་བྱེ་བ་ཕྲག་སྟོང་གཡོ་ཞིང་དེ་དག་འོད་ཀྱིས་སྣང་བྱེད་པའོ། རྨི་ལམ་གྱི་ཁྱད་པར། རྗེས་ཐོབ་ཏུ་རྒྱན་ཐམས་ཅད་ཀྱིས་བརྒྱན་པའི་བུད་མེད་ཀྱི་མགོ་ལ་མེ་ཏོག་ཙམ་པ་ཀའིཕྲེང་བ་འདོགས་པ་རྨི་བའོ། སྙོམས་པར་འཇུག་པའི་ཁྱད་པར། ཏིང་ངེ་འཛིན་གྱི་སྒོ་བྱེ་བ་ཕྲག་སྟོང་ལ་སྙོམས་པར་འཇུག་པའོ། ཆོས་སྟོན་པའི་ཁྱད་པར། དུས་སྐད་ཅིག་མར་གདུལ་བྱའི་དོན་དུ་ཆོས་ཀྱི་སྒོ་མོ་བྱེ་བ་ཕྲག་སྟོང་གསུངས་ནས་གདུལ་བྱ་དེ་སྙེད་སྨིན་པར་བྱེད་པའོ། རྟོགས་པའི་ཁྱད་པར། ས་འདི་ལ་གནས་པས་བདག་གཞན་མཉམ་པ་སོགས་མཉམ་ཉིད་བཅུའི་དོན་རྟོགས་པས་ཆོས་ཀྱི་དབྱིངས་རྒྱུད་ཐ་དད་པ་མེད་པའི་དོན་དུ་གཟིགས་ཏེ། རིན་ཕྲེང་ལས། རྒྱུད་རྣམས་ཐ་དད་མེད་དོན་དང་། ཅེས་གསུངས། སྤོང་བའི་ཁྱད་པར་ཆོས་དབྱིངས་རྒྱུད་ཐ་དད་དུ་ཞེན་པའི་གནས་ངན་ལེན་ནམ་སྒོམ་སྤང་འབྲིང་སྐོར་གསུམ་ལས་འབྲིངགི་འབྲིང་སྤོང་བའོ། རྣམ་པར་དག་པའི་ཁྱད་པར། སྔར་ལྟར་རྒྱུ་གསུམ་པོ་དེས་དགེ་བའི་རྩ་བ་རྒྱ་ཆེར་རྣམ་པར་དག་པར་འགྱུར་ཏེ། ས་བཅུ་པ་ལས། དཔེར་ན་གསེར་ས་ལེ་སྦྲམ་དེ་ཉིད་གསེར་མགར་མཁས་པས་བྱི་དོར་བྱས་པ་དེ་ལ། རིན་པོ་ཆེ་སྤུག་ཀྱིས་སྤྲས་པ་ན་མཚུངས་པ་མེད་པའི་ཕྱིར། དེ་མ་ཡིན་པའི་གསེར་དག་གིས་མི་འཕྲོག་པ་ཡིན་ནོ། དེ་བཞིན་དུ་ས་ལྔ་པ་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་ཡང་ཐབས་དང་ཤེས་རབ་གཉིས་ཀྱི་དཔྱད་པས་རྣམ་པར་དག་སྟེ། ས་འོག་མ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བས་མི་འཕྲོག་པ་ཡིན་ནོ། ཞེས་གསུངས་སོ། ཡོངས་སུ་སྲུང་བའི་ཁྱད་པར།རིན་པོ་ཆེའི་མེ་ཏོག་གི་ཏིང་ངེ་འཛིན་ཡོན་ཏན་སྣ་ཚོགས་པ་བཀོད་པའི་གཟུངས་ཀྱིས་སྲུང་བའོ། ཡོངས་སུ་སྦྱང་བའི་ཁྱད་པར། རྙེད་སོགས་ཀྱི་ཆེད་དུ་ཁྱིམ་པ་དང་འདྲིས་པ་སྤངས་པ་སོགས་བཅུ་དྲུག་གིས་ས་དེ་ཐོབ་ཅིང་རྣམ་པར་དག་པར་འགྱུར་རོ། སངས་རྒྱས་བྱེ་བ་བརྒྱ་ཕྲག་སྟོང་གི་ཞལ་མཐོང་ཞིང་ཏིང་ངེ་འཛིན་གྱི་སྒོ་བྱེ་བ་བརྒྱ་ཕྲག་སྟོང་ལ་སྙོམས་པར་འཇུག་པ་སོགས་ཡོན་ཏན་བརྒྱ་ཕྲག་དུ་མའི་གཞིར་གྱུར་པའི་འཕགས་རྒྱུད་ཀྱི་མངོན་རྟོགས།
ས་དྲུག་པའི་ངོ་བོ། མིང་གི་ཁྱད་པར་མངོན་དུ་གྱུར་པའོ། ངེས་ཚིག་གི་ཁྱད་པར། ས་འདིར་ཤེས་རབ་ཀྱི་ཕར་ཕྱིན་ལྷག་པའི་སྟབས་ཀྱིས་འཁོར་འདས་ཀྱི་གནས་ལུགས་ཟབ་མོ་མངོན་དུ་གྱུར་པས་ན་མིང་དེ་སྐད་ཅེས་བྱ་བ་སྟེ། རིན་ཕྲེང་ལས། འཁོར་བ་དང་ནི་མྱ་ངན་འདས། གཉིས་འདིར་མངོན་དུ་གྱུར་པས་ན། མངོན་དུ་གྱུར་པའི་ས་ཞེས་བཤད། ཅེས་གསུངས། ཕར་ཕྱིན་ལྷག་པའི་ཁྱད་པར། ས་འདིར་ཡང་ཕར་ཕྱིན་དྲུག་ཀ་ལྡན་མོད་ལྟོས་འཇོག་གིས་ཤེས་རབ་ཀྱི་ཕར་ཕྱིན་ཆེས་ལྷག་པར་འབྱུང་བའོ། སྐྱེ་བའི་ཁྱད་པར། ས་འདི་ལ་གནས་པའི་བྱང་ཆུབ་སེམས་དཔའ་ཕལ་ཆེ་བ་ལྷ་ཡི་རབ་འཕྲུལ་དགར་སྐྱེ་བ་བཞེས་ནས་སེམས་ཅན་ཀྱི་མངོན་པའི་ང་རྒྱལ་ལྡོག་པར་མཛད་པ་སྟེ། ཇི་སྐད་དུ། དེ་ཡི་རྣམ་པར་སྨིན་པས་ནི། ལྷ་ཡི་རྒྱལ་པོ་རབ་འཕྲུལ་དགའ། ཉན་ཐོས་རྣམས་ཀྱིས་མི་འཕྲོགས་པ། ལྷག་པའི་ང་རྒྱལ་ཅན་ཞི་བྱེད། ཅེས་སོ། སངས་རྒྱས་བྱེ་བ་ཕྲག་བརྒྱ་སྟོང་གི་ཞལ་མཐོང་ཞིང་བྱིན་གྱིས་རློབས་པའོ། རྫུ་འཕྲུལ་གྱི་ཁྱད་པར། རང་གི་ལུས་བྱེ་བ་ཕྲག་བརྒྱ་སྟོང་དུ་སྤྲུལ་བ་དང་། སངས་རྒྱས་ཀྱི་ཞིང་བྱེ་བ་ཕྲག་བརྒྱ་སྟོང་དུ་འགྲོ་བ། འཇིག་རྟེན་གྱི་ཞིང་དེ་སྙེད་གཡོ་ཞིང་འོད་ཀྱིས་སྣང་བར་བྱེད་པའོ། སྙོམས་པར་འཇུག་པའི་ཁྱད་པར། དུས་སྐད་ཅིག་ཡུད་ཙམ་ལ། ཏིང་ངེ་འཛིན་གྱི་སྒོ་བྱེ་བ་བརྒྱ་ཕྲག་སྟོང་ལ་སྙོམས་པར་འཇུག་གོ། ཆོས་སྟོན་པའི་ཁྱད་པར། དུས་དེ་ཙམ་ལ་ཆོས་སྒོ་མི་འདྲ་བ་བྱེ་བ་བརྒྱ་ཕྲག་སྟོང་འབྱེད་པ་དང་སེམས་ཅན་གྱི་གྲངས་དེ་སྙེད་སྨིན་པར་བྱེད་པའོ། རྟོགས་པའི་ཁྱད་པར། རྗེས་ཐོབ་ཏུ་ཆོས་ཀྱི་དབྱིངས་ཀུན་ནས་ཉོན་མོངས་པའམ་རྣམ་པར་བྱང་བ་མ་ཡིན་པའི་གནས་སུ་རྟོགས་ཏེ། རྟེན་འབྲེལ་ཀྱི་གཤིས་ལ་ཀུན་ཉོན་དང་རྣམ་པར་བྱང་བའི་ཆོས་གང་ཡང་མ་དམིགས་པའི་ཕྱིར་རོ། དེ་སྐད་དུའང། ཉོན་མོངས་རྣམ་དག་མིན་དོན་དང་། ཞེས་སོ། སྤོང་བའི་ཁྱད་པར། ཆོས་ཀྱི་རྣམ་པར་དག་པ་མིན་པར་འཛིན་པའི་གནས་ངན་ལེན་ནམ། སྒོམ་སྤང་འབྲིང་སྐོར་གསུམ་ལས་འབྲིང་གི་ཆུང་ངུ་སྤོང་བའོ། རྒྱུ་གསུམ་གྱིས་དགེ་བའི་རྩ་བ་ཤིན་ཏུ་རྣམ་པར་དག་པར་འགྱུར་ཏེ། དཔེར་ན་གསེར་ས་ལེ་སྦྲམ་དེ་ཉིད་ལ་གསེར་མགར་མཁས་པས་རིན་པོ་ཆེ་བེཌུརྱས་སྤྲས་པ་ན་མཚུངས་པ་མེད་པའི་ཕྱིར། དེ་མ་ཡིན་པའི་གསེར་ཐམས་ཅད་ཀྱིས་མི་འཕྲོག་པ་ཡིན་ནོ། དེ་བཞིན་ས་དྲུག་པ་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་ཡང་ཐབས་དང་ཤེས་རབ་ཀྱི་དཔྱད་པས་རྣམ་པར་དག་ཅིང་འོད་གསལ་ཏེ། དེ་མ་ཡིན་པ་ས་འོག་མ་ལ་གནས་པའི་བྱང་ཆུབ་སེམས་དཔའི་དགེ་རྩས་མི་འཕྲོག་པ་ཡིན་ནོ། ཞེས་སོ། ཡོངས་སུ་སྲུང་བའི་ཁྱད་པར། ཉི་མའི་དཀྱིར་འཁོར་གཟི་བརྗིད་ཀྱི་གཟུངས་དང་། ཡེ་ཤེས་ཀྱི་དཀྱིལ་འཁོར་སྒྲོན་མེའི་གཟུངས་ཀྱིས་བསྲུང་བའོ། ཡོངས་སུ་སྦྱོང་བའི་ཁྱད་པར་སྦྱིན་པ་སོགས་ཆོས་དྲུག་ཡོངས་སུ་རྫོགས་པར་བྱ་བ་ལ་བསླབ་པ་དང་ཉན་རང་ལ་འདོད་པ་སོགས་ཆོས་དྲུག་སྤང་བ་ལ་བསླབ་པ་སྟེ། ཆོས་བཅུ་གཉིས་ཀྱིས་ས་དེ་ཐོབ་ཅིང་རྣམ་པར་དག་པར་འགྱུར་བའོ། ས་བདུན་པའི་ངོ་བོ། སངས་རྒྱས་བྱེ་བ་ཕྲག་ཁྲིག་འབུམ་གྱི་ཞལ་མཐོང་བ་དང་ཏིང་ངེ་འཛིན་གྱི་སྒོ་དེ་སྙེད་ལ་སྙོམས་པར་འཇུག་སོགས་ཡོན་ཏན་བརྒྱ་ཕྲག་དུ་མའི་གཞིར་གྱུར་པའི་འཕགས་རྒྱུད་ཀྱི་མངོན་རྟོགས་དེ་ཡིན། མིང་གི་ཁྱད་པར་རིང་དུ་སོང་བའོ། ངེས་ཚིག་གི་ཁྱད་པར། ས་འདིར་མཚན་རྩོལ་ཞི་བ་བགྲོད་གཅིག་གི་ལམ་ལ་དབང་འབྱོར་བས་མཚན་མར་འཛིན་པའི་རྩོལ་བ་དང་མ་དག་པའི་ས་ལས་རིང་དུ་སོང་བའི་དོན་གྱིས་ན་མིང་དེ་སྐད་ཅེས་བྱ་བ་ཏེ། རིན་ཕྲེང་ལས། བགྲོད་ཅིག་ལམ་དང་འབྲེལ་བའི་ཕྱིར། རིང་དུ་སོང་བའི་སར་འདོད་དོ། ཞེས་སོ། ཕར་ཕྱིན་ལྷག་པའི་ཁྱད་པར། ས་འདིར་ཕར་ཕྱིན་གཞན་དང་ལྡན་ཡང་རྟེན་འབྲེལ་གྱི་དབང་གིས་ཐབས་ཀྱི་ཕར་ཕྱིན་ལྷག་པར་འབྱུང་བའོ། སྐྱེ་བའི་ཁྱད་པར། ས་འདིར་གནས་པའི་བྱང་སེམས་ཕལ་ཆེ་བ་ལྷ་ཡི་རྒྱལ་པོ་དབང་བསྒྱུར་དུ་གྱུར་ནས་ཉན་ཐོས་ཀྱི་མངོན་པར་རྟོགས་པ་བསྒྲུབ་པར་མཛད་པ་སྟེ། དེ་ཡི་རྣམ་པར་སྨིན་པས་ནི། དབང་བསྒྱུར་ལྷ་ཡི་རྒྱལ་པོར་འགྱུར། འཕགས་པའི་བདེན་པ་མངོན་རྟོགས་པའི། སློབ་དཔོན་ཁྱུ་མཆོག་ཆེན་པོར་འགྱུར།ཞེས་གསུངས། མཐོང་བའི་ཁྱད་པར། སངས་རྒྱས་བྱེ་བ་ཁྲག་ཁྲིག་འབུམ་གྱི་ཞལ་མཐོང་ཞིང་དེ་དག་གིས་བྱིན་གྱིས་རློབས་པའོ། རྫུ་འཕྲུལ་གྱི་ཁྱད་པར། རང་གི་ལུས་བྱེ་བ་ཁྲག་ཁྲིག་འབུམ་དུ་སྤྲུལ་བ་དང་དང་སངས་རྒྱས་ཀྱི་ཞིང་དེ་སྙེད་དུ་འགྲོ་བ། འཇིག་རྟེན་གྱི་ཁམས་བྱེ་བ་ཁྲག་ཁྲིག་འབུམ་གཡོ་ཞིང་དེ་དག་འོད་ཀྱིས་སྣང་བར་བྱེད་པའོ། རྨི་ལམ་གྱི་ཁྱད་པར། རྗེས་ཐོབ་ཏུ་གཡས་གཡོན་གཉིས་ན་སེམས་ཅན་དམྱལ་བའི་གཡང་ས་མཐོང་སྟེ། དེ་ལས་བདག་ཉིད་མ་རྨས་མ་ཉམས་པར་སླར་ལྡོག་པར་རྨི་བའོ། སྙོམས་པར་འཇུག་པའི་ཁྱད་པར། ཏིན་ངེ་འཛིན་གྱི་སྒོ་བྱེ་བ་ཕྲག་ཁྲིག་འབུམ་ལ་སྙོམས་པར་འཇུག་པའོ། ཆོས་སྟོན་པའི་ཁྱད་པར། རྗེས་ཐོབ་ཏུ་ཆོས་ཀྱི་སྒོ་བྱེ་བ་ཁྲག་ཁྲིག་འབུམ་འབྱེད་པ་དང་སེམས་ཅན་གྱི་གྲངས་དེ་སྙེད་སྨིན་པར་བྱེད་པའོ། རྟོགས་པའི་ཁྱད་པར། ཆོས་ཀྱི་དབྱིངས་ལུང་གི་མཚན་མའི་རང་བཞིན་དུ་མ་གྲུབ་པར་རྟོགས་པས་མདོ་ལ་སོགས་པའི་མདོ་ལ་སོགས་པ་ཆོས་ཀྱི་མཚན་མ་ཐ་དད་པར་གཟུངས་བའི་རྟོག་པ་མི་འབྱུང་བ་སྟེ། ཐ་དད་མེད་པའི་དོན་ཉིད་དང་། ཞེས་སོ། སྤོང་བའི་ཁྱད་པར། ཆོས་ཀྱི་དབྱིངས་ལུང་ཆོས་ཀྱི་མཚན་མར་འཛིན་པའི་གནས་ངན་ལེན་སམ་སྒོམ་སྤོང་འབྲིང་སྐོར་གསུམ་ལས་འབྲིང་གི་ཆུང་ངོ་སྤོང་བའོ། རྣམ་པར་དག་པའི་ཁྱད་པར། དཀོན་མཆོག་མཆོད་པ་དང་། སེམས་ཅན་སྨིན་པ། དགེ་རྩ་བྱང་ཆུབ་ཏུ་བསྔོ་བ་སྟེ་རྒྱུ་གསུམ་གྱིས་དགེ་བའི་རྩ་བ་རྣམས་རྒྱ་ཆེར་རྣམ་པར་དག་པར་འགྱུར་ཏེ། དཔེར་ན་གསེར་ས་ལེ་སྦྲམ་དེ་ཉིད་གསེར་མགར་མཁས་པས་ནོར་བུ་རིན་པོ་ཆེ་ཐམས་ཅད་ཀྱིས་སྤྲས་ན་ཤིན་ཏུ་མཛེས་ཏེ། དེ་མ་ཡིན་པའི་འཛམ་བུའི་གླིང་གི་རྒྱན་ཐམས་ཀྱིས་མི་འཕྲོག་པ་ཡིན་ནོ། དེ་བཞིན་དུ་ས་བདུན་པ་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་ཡང་ཆེས་རྣམ་པར་དག་པས་ཉན་རང་དང་དེ་མ་ཡིན་པའི་ས་འོག་མ་ལ་གནས་བྱང་ཆུབ་སེམས་དཔའི་དགེ་བའི་རྩ་བ་རྣམས་ཀྱིས་མི་འཕྲོག་པ་ཡིན་ནོ། ཞེས་གསུངས། ཡོངས་སུ་བསྲུང་བའི་ཁྱད་པར། དོན་ཐམས་ཅད་གྲུབ་པས་ཁྱད་པར་དུ་བྱས་པ་ཞེས་པའི་གཟུངས་ཀྱིས་སྲུང་བའོ། ཡོངས་སུ་སྦྱོང་བའི་ཁྱད་པར། བདག་ཏུ་འཛིན་པ་སོགས་ཉི་ཤུ་སྤངས་ནས་དེ་ལས་བཟློག་པ་རྣམ་ཐར་སྒོ་གསུམ་ཤེས་པ་སོགས་ཉི་ཤུས་ས་དེ་ཐོབ་ཅིང་རྣམ་པར་དག་པར་འགྱུར་བའོ།
ས་བརྒྱད་པའི་ངོ་བོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འབུམ་ཕྲག་གཅིག་གི་རྡུལ་གྱི་གྲངས་དང་མཉམ་པའི་སངས་རྒྱས་ཀྱི་ཞལ་མཐོང་བ་དང་ཏིང་ངེ་འཛིན་གྱི་སྒོ་དེ་སྙེད་ལ་སྙོམས་པར་འཇུག་པ་སོགས་ཡོན་ཏན་བརྒྱ་ཕྲག་དུ་མའི་གཞིར་གྱུར་པའི་འཕགས་རྒྱུད་ཀྱི་མངོན་རྟོགས་དེའོ། མིང་གི་ཁྱད་པར་མི་གཡོ་བའོ། ངེས་ཚིག་གི་ཁྱད་པར་ས་དེར་མཚན་མ་དང་མཚན་མ་མེད་པའི་འདུ་ཤེས་ཀྱིས་མི་གཡོ་བའི་ཕྱིར་ན་མི་གཡོ་བའི་ས་ཞེས་བྱ་སྟེ། འདུ་ཤེས་གཉིས་ཀྱིས་མི་གཡོ་ཕྱིར། མི་གཡོ་བ་ཡི་སར་བརྗོད་དོ་། ཞེས་སོ། ཕར་ཕྱིན་ལྷག་པའི་ཁྱད་པར། ས་དེར་ཕར་ཕྱིན་གཞན་ཡང་ལྡན་མོད་ཀྱི་གཙོ་ཆེར་སྨོན་ལམ་ཀྱི་ཕར་ཕྱིན་ཉིད་འབྱུང་བའོ། ས་འདིར་གནས་པའི་བྱང་སེམས་ཕལ་ཆེ་བ་སྟོང་སྤྱི་ཕུད་ལ་དབང་བའི་རྒྱལ་པོ་ཚངས་པར་གྱུར་ནས་དགྲ་བཅོམ་པ་དང་།རང་རྒྱལ་ལ་སོགས་པའི་དོན་མཆོག་ཏུ་གཏན་ལ་འབེབ་པར་མཛད་པ་སྟེ། དེ་ཡི་རྣམ་པར་སྨིན་པས་ནི། སྟོང་གི་བདག་པོ་ཚངས་པར་འགྱུར། དགྲ་བཅོམ་རང་སངས་རྒྱས་རྣམས་ཀྱི། དོན་གཏན་འབེབ་ལ་ཐོག་པ་མེད། ཅེས་པ་བཞིན་ནོ། མཐོང་བའི་ཁྱད་པར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འབུམ་ཕྲག་གཅིག་གི་རྡུལ་ཕྲ་རབ་དང་མཉམ་པའི་སངས་རྒྱས་ཀྱི་ཞལ་མཐོང་ཞིང་བྱིན་གྱིས་རླབས་པ་ཤེས་སོ། རྫུ་འཕྲུལ་གྱི་ཁྱད་པར། རང་གི་ལུས་སྟོང་གསུམ་གྱི་སྟོང་ཆེན་པོ་འབུམ་ཕྲག་གཅིག་གི་རྡུལ་གྱི་གྲངས་དང་མཉམ་པར་སྤྲུལ་ཞིང་སངས་རྒྱས་ཀྱི་དེ་སྙེད་ཏུ་འགྲོ་བ། སྟོང་གསུམ་གྱི་སྟོང་ཆེན་པོ་འབུམ་ཕྲག་གཅིག་གི་རྡུལ་ཕྲ་རབ་ཀྱི་གྲངས་དང་མཉམ་པའི་འཇིག་རྟེན་གྱི་ཁམས་གཡོ་བ་དང་འོད་ཀྱིས་སྣང་བར་བྱེད་དོ། རྨི་ལམ་གྱི་ཁྱད་པར། ཕྲག་པ་གཉིས་ན་རི་དྭགས་ཀྱི་རྒྱལ་པོ་སེང་གེ་རལ་པ་ཅན་ཅོད་པན་ཐོག་པ་གཅན་ཟན་ཕྲ་མོ་ཐམས་ཅད་སྐྲག་པར་བྱེད་པ་རྨི་བའོ། སྙོམས་པར་འཇུག་པའི་ཁྱད་པར། སྟོང་གསུམ་གྱི་སྟོང་ཆེན་པོ་འབུམ་ཕྲག་གཅིག་གི་རྡུལ་གྱི་གྲངས་དང་མཉམ་པའི་ཏིང་ངེ་འཛིན་གྱི་སྒོ་དཔག་ཏུ་མེད་པ་ལ་སྙོམས་པར་འཇུག་གོ། ཆོས་སྟོན་པའི་ཁྱད་ཡང་གྲངས་དེ་རྙེད་ཀྱི་ཆོས་སྒོ་དཔག་ཏུ་མེད་པ་གསུངས་པའོ། རྟོགས་པའི་ཁྱད་པར། ས་འདིར་གནས་པས་ཆོས་ཀྱི་དབྱིངས་ཀུན་བྱང་གི་ཆོས་ཀྱིས་བྲི་འཕེལ་མེད་པའི་དོན་དུ་རྟོགས་ཏེ། བྲི་མེད་འཕེལ་བ་མེད་དོན་དང་། ཅེས་སོ། སྤོང་བའི་ཁྱད་པར། ཆོས་དབྱིངས་བྲི་གང་གི་མཚན་མ་ཅན་དུ་འཛིན་པའི་གནས་ངན་ལན་དང་། སྒོམ་སྤོང་ཆུང་སྐོར་གསུམ་ལས་ཆུང་ངུའི་ཆེན་པོ་སྤོང་བའོ། རྣམ་པར་དག་པའི་ཁྱད་པར། རྒྱུ་གསུམ་གྱིས་དགེ་བའི་རྩ་བ་རྣམས་ཆེས་རྣམ་པར་དག་པར་འགྱུར་ཏེ། དཔེར་ན་གསེར་ས་ལེ་སྦྲམ་དེ་ཉིད་མགར་བ་མཁས་པས་རྒྱན་དུ་ཟིན་པར་བྱས་ཏེ། འཛམ་གླིང་གི་བདག་པོའི་མགོ་འམ་མགུལ་དུ་བཏགས་ན་འཛམ་བུའི་གླིང་གི་སེམས་ཅན་ཐམས་ཅད་ཀྱི་རྒྱན་གྱིས་མི་འཕྲོག་པ་ཡིན་ནོ། དེ་བཞིན་དུ་ས་བརྒྱད་པ་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་རྣམས་ཤིན་ཏུ་རྣམ་པར་དག་པའི་ཕྱིར། ཉན་རང་དང་བྱང་ཆུབ་སེམས་དཔའ་ས་བདུན་པ་ལ་གནས་པའི་བར་དག་གིས་མི་འཕྲོག་པ་ཡིན་ནོ། ཞེས་གསུངས་སོ། ཡོངས་སུ་སྲུང་བའི་ཁྱད་པར། སངས་རྒྱས་གཟིགས་པ་ཞེས་བྱ་བའི་གཟུངས་ཀྱིས་སྲུང་བའོ།
ས་དགུ་པའི་ངོ་བོ། སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྡུལ་ཕྲ་རབ་ཀྱི་གྲངས་དང་མཉམ་པའི་སངས་རྒྱས་ཀྱི་ཞལ་མཐོང་བ་དང་ཏིང་ངེ་འཛིན་གྱི་སྒོ་དེ་སྙེད་ལ་སྙོམས་པར་འཇུག་པ་སོགས་ཡོན་ཏན་བརྒྱ་ཕྲག་དུ་མའི་གཞིར་གྱུར་པ་དེའོ། མིང་གི་ཁྱད་པར་ལེགས་པའི་བློ་གྲོས་ཞེས་བྱའོ། ངེས་ཚིག་གི་ཁྱད་པར། ས་དེར་སོ་སོ་ཡང་དག་པར་རིག་པའི་བློ་གྲོས་ཤིན་ཏུ་བཟང་བ་ཐོབ་པས་ན་ལེགས་པའི་བློ་གྲོས་ཞེས་བྱ་སྟེ། མདོ་སྡེ་རྒྱན་ལས། སོ་སོ་ཡང་དག་རིག་བློ་བཟང་། ས་དེ་ལེགས་པའི་བློ་གྲོས་ཡིན། ཅེས་དང་། རིན་ཆེན་ཕྲེང་བ་ལས། ས་དགུ་པ་ནི་ལེགས་པ་ཡི། བློ་གྲོས་ཡིན་ཏེ་རྒྱ་མཚོ་བཞིན། གང་ཕྱིར་སོ་སོ་ཡང་དག་རིག། ཐོབ་པས་འདི་ནི་བློ་གྲོས་བཟང་། ཞེས་སོ། ཕར་ཕྱིན་ལྷག་པའི་ཁྱད་པར། ས་འདིར་ཕར་ཕྱིན་གཞན་ཡང་ལྡན་མོད་སྟོབས་ཀྱི་ཕར་ཕྱིན་ཆེས་ལྷག་པར་གྱུར་པའོ། སྐྱེ་བའི་ཁྱད་པར་ས་འདིར་གནས་པ་ཕལ་ཆེ་བ་སྟོང་གཉིས་པ་བར་མའི་འཇིག་རྟེན་ལ་དབང་བསྒྱུར་བའི་ལྷ་ཡི་རྒྱལ་པོ་ཚངས་པར་གྱུར་ནས་དྲིས་པ་ཐམས་ཅད་ཀྱི་ལན་ལྡོན་པ་སྟེ། དེ་ཡི་རྣམ་པར་སྨིན་པས་ནི། སྟོང་གཉིས་བདག་པོ་ཚངས་པར་འགྱུར། སེམས་ཅན་བསམ་པ་དྲིས་པ་ལས། དགྲ་བཅོམ་སོགས་ཀྱིས་འཕྲོག་པ་མེད། ཞེས་གསུངས་སོ། མཐོང་བའི་ཁྱད་པར་སྐད་ཅིག་ཐང་ཅིག་ཡུད་ཙམ་རེར་ཡང་སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྡུལ་ཕྲ་རབ་ཀྱི་གྲངས་དང་མཉམ་པའི་སངས་རྒྱས་ཀྱི་ཞལ་མཐོང་བ་དང་དེ་དག་གིས་བྱིན་གྱིས་བརླབས་པའང་ཤེས་སོ། རྫུ་འཕྲུལ་གྱི་ཁྱད་པར། རང་གི་ལུས་སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྡུལ་ཕྲ་རབ་ཀྱི་གྲངས་དང་མཉམ་པར་སྤྲུལ་ཞིང་སངས་རྒྱས་ཀྱི་ཞིང་དེ་སྙེད་དུ་འགྲོ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྡུལ་ཕྲ་རབ་ཀྱི་གྲངས་དང་མཉམ་པ་གཡོ་ཞིང་། དེ་དག་འོད་ཀྱིས་སྣང་བར་བྱེད་པའོ། རྨི་ལམ་གྱི་ཁྱད་པར། འཁོར་ལོས་བསྒྱུར་བའི་རྒྱལ་པོ་མཐོང་སྟེ། སྐྱེ་བོ་བྱེ་བ་ཕྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་ནས་བལྟས་ནས་རིན་པོ་ཆེ་སྣ་ཚོགས་པས་སྤྲས་པའི་གདུག་དཀར་པོ་འཛིན་པ་རྨི་བའོ། སྙོམས་པར་འཇུག་པའི་ཁྱད་པར། སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྡུལ་ཕྲ་རབ་ཀྱི་གྲངས་དང་མཉམ་པའི་ཏིང་ངེ་འཛིན་གྱི་་སྒོ་བསམ་གྱིས་མི་ཁྱབ་པ་ལ་སྙོམས་པར་འཇུག་པའོ། ཆོས་སྟོན་པའི་ཁྱད་པར། རྗེས་ཐོབ་ཏུ་སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྡུལ་ཕྲ་རབ་ཀྱི་གྲངས་དང་མཉམ་པའི་ཆོས་ཀྱི་སྒོ་དཔག་ཏུ་མེད་པ་འབྱེད་པ་དང་། གྲངས་དེ་སྙེད་ཀྱི་སེམས་ཅན་སྨིན་པར་བྱེད་པའོ། རྟོགས་པའི་ཁྱད་པར། ཆོས་ཀྱི་དབྱིངས་དེ་ཉིད་ཡེ་ཤེས་ལ་དབང་བའི་གནས་སུ་རྟོགས་ཏེ། ས་དེར་སོ་སོ་ཡང་དག་པར་རིག་པ་བཞི་ལ་དབང་ཐོབ་པའི་ཕྱིརཏེ། ཞིང་དང་ཡེ་ཤེས་ལས་དག་ལ། དབང་ནི་རྣམ་པ་བཞི་ཡིས་གནས། ཞེས་དང་། འཕགས་པ་ས་བཅུ་པ་ལས། སོ་སོ་ཡང་དག་པར་རིག་པ་བཞི་གང་ཞེ་ན། འདི་དག་སྟེ། ཆོས་སོ་སོ་ཡང་དག་པར་རིག་པ་དང་། དོན་སོ་སོ་ཡང་དག་པར་རིག་པ། ངེས་ཚིག་སོ་སོ་ཡང་དག་པར་རིག་པ། སྤོབ་པ་སོ་སོ་ཡང་དག་པར་རིག་པ་རྒྱུན་དུ་འབྱུང་ངོ་། ཞེས་སོ། སྤོང་བའི་ཁྱད་པར། ཆོས་ཀྱི་དབྱིངས་ཡེ་ཤེས་ལ་དབང་བའི་གནས་མ་ཡིན་པར་འཛིན་པ་དང་། སྒོམ་སྤོང་ཆུང་སྐོར་གསུམ་ལས་ཆུང་ངུའི་འབྲིང་སྤོང་བའོ། རྣམ་པར་དག་པའི་ཁྱད་པར། སྔར་བཞིན་རྒྱུ་གསུམ་པོ་དེས་དགེ་བའི་རྩ་བ་ཆེས་ཤིན་ཏུ་རྣམ་པར་དག་པར་དག་པར་འགྱུར་ཏེ། ཇི་སྐད་དུ། དཔེར་ན་གསེར་ས་ལེ་སྦྲམ་དེ་ཉིད་གསེར་མགར་མཁས་པས་རྒྱན་དུ་བྱས་པ་དེ། འཁོར་ལོས་བསྒྱུར་བའི་མགོའམ་མགུལ་དུ་བཏགས་ན་ཁམས་ཀྱི་རྒྱལ་པོ་རྣམས་དང་། གླིང་བཞི་པའི་སེམས་ཅན་རྣམས་ཀྱི་རྒྱན་གྱིས་མི་འཕྲོག་པ་ཡིན་ནོ། དེ་བཞིན་དུ་ས་དགུ་པ་ལ་གནས་པའི་དགེ་བའི་རྩ་བ་ཡེ་ཤེས་ཀྱི་སྣང་བ་ཆེན་པོས་བརྒྱན་པ། ཉན་རང་དང་ས་འོག་མ་ལ་གནས་པའི་བྱང་སེམས་ཐམས་ཀྱིས་མི་འཕྲོག་པ་ཡིན་ནོ། ཞེས་གསུངས་སོ།
ས་བཅུ་པའི་ངོ་བོ་ནི། སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཕྲག་ཁྲིག་འབུམ་ཕྲག་བཅུའི་རྡུལ་སྙེད་ཀྱི་སངས་རྒྱས་ཀྱི་ཞལ་མཐོང་བ་དང་། ཏིང་ངེ་འཛིན་གྱི་སྒོ་དེ་སྙེད་ལ་སྙོམས་པར་འཇུག་པ་སོགས་ཡོན་ཏན་བརྒྱ་ཕྲག་དུ་མའི་གཞིར་གྱུར་པའི་འཕགས་རྒྱུད་ཀྱི་མངོན་རྟོགས་དེའོ། ས་བཅུ་པའི་མིང་གི་ཁྱད་པར་ཆོས་ཀྱི་སྤྲིན་ནོ། ངེས་ཚིག་གི་ཁྱད་པར། བྱང་སེམས་ས་བཅུ་པ་བ་དེས་གཟུངས་དང་ཏིང་ངེ་འཛིན་གྱི་སྤྲིན་བཀོད་པ་ལས། སངས་རྒྱས་དང་རྗེས་སུ་མཐུན་པའི་ཆོས་ཀྱི་ཆར་ཕབ་ནས་གདུལ་བྱའི་ལོ་ཏོག་སྨིན་པར་བྱེད་པས་ན་ཆོས་ཀྱི་སྤྲིན་ཞེས་བྱ་བའོ། ཕར་ཕྱིན་ལྷག་པའི་ཁྱད་པར། ས་དེར་ཕར་ཕྱིན་བཅུ་ཀ་ལྡན་ཡང་ཡེ་ཤེས་ཀྱི་ཕར་ཕྱིན་ཉིད་ཆེས་ལྷག་པར་གྱུར་པའོ། སྐྱེ་བའི་ཁྱད་པར། ས་འདི་ལ་གནས་པ་ཕལ་ཆེ་བ་ལྷའི་རྒྱལ་པོ་དབང་ཕྱུག་ཆེན་པོར་གྱུར་ནས་སེམས་ཅན་དང་། ཉན་རང་བྱང་སེམས་བཅས་ལ་ཕ་རོལ་ཏུ་ཕྱིན་པའི་ཆོས་སྟོན་པར་མཁས་པ་སྟེ། དེ་ཡི་རྣམ་པར་སྨིན་པས་ནི། གནས་གཙང་ལྷ་ཡི་རྒྱལ་པོར་འགྱུར། བསམ་ཡས་ཡེ་ཤེས་ཡུལ་གྱི་བདག། དབང་ཕྱུག་ཆེན་པོ་མཆོག་ཡིན་ནོ། ཞེས་གསུངས་སོ། མཐོང་བའི་ཁྱད་པར། སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཕྲག་ཁྲིག་འབུམ་ཕྲག་བཅུའི་རྡུལ་རྙེད་ཀྱི་སངས་རྒྱས་ཀྱི་ཞལ་མཐོང་བའོ། རྫུ་འཕྲུལ་གྱི་ཁྱད་པར། རང་གི་ལུས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཕྲག་ཁྲིག་འབུམ་ཕྲག་བཅུའི་རྡུལ་རྙེད་ཀྱི་གྲངས་དང་མཉམ་པར་སྤྲུལ་ཞིང་སངས་རྒྱས་ཞིང་དེ་སྙེད་དུ་འགྲོ་བ། སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཕྲག་ཁྲིག་འབུམ་ཕྲག་བཅུའི་རྡུལ་ཀྱི་གྲངས་དང་མཉམ་པའི་འཇིག་རྟེན་གྱི་ཁམས་གཡོ་བ་དང་དེ་དག་འོད་ཀྱིས་སྣང་བར་བྱེད་པའོ། རྨི་ལམ་གྱི་ཁྱད་པར་ནི། རྗེས་ཐོབ་ཏུ་དེ་བཞིན་གཤེགས་པའི་སྐུ་མཐོང་སྟེ། མདོག་གསེར་ལྟ་བུ་འོད་འདོམ་གང་བ་ཚངས་པ་ཕྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཞིང་ཞིང་མདུན་གྱིས་བལྟས་པ་ལ་ཆོས་སྟོན་པ་རྨི་བའོ། སྙོམས་པར་འཇུག་པའི་ཁྱད་པར། དུས་སྐད་ཅིག་མ་གཅིག་ལ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཕྲག་ཁྲིག་འབུམ་ཕྲག་བཅུའི་རྡུལ་གྱི་གྲངས་དང་མཉམ་པའི་ཏིང་ངེ་འཛིན་གྱི་སྒོ་དཔག་ཏུ་མེད་པ་ལ་སྙོམས་པར་འཇུག་པའོ། ཆོས་སྟོན་པའི་ཁྱད་པར་ཡང་། གྲངས་དེ་སྙེད་ཀྱི་ཆོས་ཀྱི་སྒོ་དཔག་ཏུ་མེད་པ་འབྱེད་པ་དང་། དེ་སྙེད་ཀྱི་གདུལ་བྱ་སྨིན་པར་མཛད་པའོ། རྟོགས་པའི་ཁྱད་པར། དབང་རྣམ་པ་བཞི་ལས་ཆོས་ཀྱི་དབྱིངས་དེ་ལས་ལ་དབང་བའི་གནས་ཉིད་དུ་རྟོགས་ཏེ། ས་བཅུ་པའི་རྗེས་ཐོབ་ཏུ་ཇི་ལྟར་བཞེད་པ་བཞིན་སྤྲུལ་ནས་སེམས་ཅན་གྱི་དོན་བྱེད་པ་ལ་སངས་རྒྱས་དང་ཆ་འདྲ་བའི་ནུས་པ་ཐོབ་པས་སོ།དེ་ལྟར་ཡང་རིན་ཆེན་ཕྲེང་བ་ལས། ལས་དག་ལ། དབང་ནི་རྣམ་པ་བཞི་ཡིས་གནས། ཞེས་སོ། སྤོང་བའི་ཁྱད་པར། ཆོས་ཀྱི་དབྱིངས་ལས་ལ་དབང་བའི་གནས་མ་ཡིན་པ་ཉིད་དུ་འཛིན་པའི་གནས་ངན་ལེན་དང་། སྒོམ་སྤོང་ཆུང་སྐོར་གསུལ་གྱི་ཆུང་ངུའི་ཆུང་ངུ་སྤོང་བའོ། རྣམ་པར་དག་པའི་ཁྱད་པར་ཡང་། སྔར་བཤད་པའི་རྒྱུ་གསུམ་པོ་དེས་དེའི་དགེ་བའི་ཤེས་རབ་ཏུ་རྣམ་པར་དག་པར་འགྱུར་ཏེ། ཇི་སྐད་དུ། དཔེར་ན་ལྷའི་རྒྱལ་པོ་མཁན་པོ་དང་བཟོ་བོས་མ་བྱས་པ། ནོར་བུ་རིན་པོ་ཆེས་སྤྲས་པ་དེ། ལྷའི་རྒྱལ་པོ་དབང་བསྒྱུར་གྱི་མགོ་འམ་མགུལ་དུ་བཏགས་ན། དེ་མ་ཡིན་པའི་ལྷ་དང་མའི་རྒྱན་གྱི་རྣམ་པ་དག་གིས་མི་འཕྲོག་པ་ཡིན་ནོ། དེ་བཞིན་དུ་ས་བཅུ་པ་ལ་གནས་པའི་བྱང་ཆུབ་སེམས་དཔའ་དེའི་ཡེ་ཤེས་ཀྱི་རྒྱུ་དེ་དག་ཀྱང་། སེམས་ཅན་ཐམས་ཅད་དང་ཉན་རང་ཐམས་ཅད་དང་། ས་དགུ་པ་མན་ཆད་ཀྱི་བྱང་ཆུབ་སེམས་དཔའ་ཐམས་ཅད་ཀྱིས་མི་འཕྲོག་པ་ཡིན་ནོ། ཞེས་གསུངས་སོ། ཡོངས་སུ་སྲུང་བའི་ཁྱད་པར། ས་བཅུ་པ་ནི་དཔལ་བར་འགྲོ་བའི་ཏིང་ངེ་འཛིན་གྱིས་ཐོབ་ཅིང་ཟད་མི་ཤེས་པའི་ཟ་མ་ཏོག་གི་གཟུངས་ཀྱིས་སྲུང་བའོ།
ས་དང་ལམ་གྱི་རྣམ་བཞག་མདོར་བསྡུས་པ།
ས་ཆེན་འཕགས་པ་རྣམས་ཀྱི་བགྲོད་ཚུལ་བཞིན།
ས་མཐར་གནས་པའི་འདོ་མེད་འཁྱམས་པོ་ངས།
ས་ལམ་ཤེས་འདོད་འགའ་ཡི་ཆེད་དུ་བྲིས།
发自我的 iPad
发自我的 iPad
No comments:
Post a Comment